Наградата за најдобар млад џез-музичар „Гоце Димитровски“ годинава му припадна на младиот и талентиран саксофонист Христијан Ристески. Признанието ќе биде врачено во рамки на 9. издание на Џез фактори фестивалот – Националната џез платформа, кој ќе се одржи од 15 до 19 април во Битола, Скопје, Демир Хисар и Охрид, со настапи на реномирани џез музичари од Македонија и странство.
„Ја користиме оваа прилика искрено да му честитаме на Христијан за ова значајно признание и да му посакаме многу успеси, инспирација и блескава иднина на џез сцената“, истакна директорот на фестивалот, професорот Сашо Поповски.
Наградата традиционално се доделува во соработка со стратешкиот партнер „Синпекс Битола“, а свеченото врачување ќе се одржи на 17 април 2026 година (петок), со почеток во 20 часот, на сцената на Народниот театар во Битола.
Во изминатите години добитници на наградата „Гоце Димитровски“ беа: Александар Ванчовски (2020 – тапани), Филип Динев (2021 – гитара), Александар Бошков (2022 – гитара), Јован Цветковиќ (2023 – пијано), Давид Скерлевски (2024 – пијано), Теодор Јаневски (2025 – тапани), а годинава признанието му припадна на Христијан Ристески за саксофон.
Надминувајќи го класичниот фестивалски формат, Џез фактори фестивалот прераснува во национално културно движење кое ги поврзува градовите, уметниците, институциите и публиката преку современиот џез израз. Оваа година фестивалот ќе се реализира во повеќе градови низ земјава, со учество на уметници од Франција, Израел, Албанија, Австрија, Унгарија, Полска, Црна Гора, Србија и Македонија.
