На 9 јули (четврток), со почеток во 20:00 часот, ќе биде отворена изложбата на лумен принтови „Фрагменти од НАС“ од битолската фотографка Кети Талевска Бакревска.
Изложбата претставува интимно визуелно истражување на жената како слоевито суштество – тело, мисла и дух – изразено преку специфичниот јазик на лумен принтот, фотографски процес во кој сончевата светлина дејствува како коавтор.
Во оваа серија, авторката му дозволува на моментот да се случи природно, да се впие и да остави своја трага. Просторот на изложбата е концептуално поделен на три столба на постоењето, претставени преку три женски силуети, создадени исклучиво со техниката на лумен принтот. Преку светлината, времето и природните процеси, делата отвораат простор за размислување за идентитетот, личното искуство и различните слоеви на човековото постоење.
Кети Талевска Бакревска од Битола е фотографка која работи со алтернативни фотографски процеси, меѓу кои лумен принтови, цијанотипија, класична аналогна фотографија и камера обскура. Нејзиното творештво е инспирирано од природата, светлината и трагите што тие ги оставаат на хартијата, а преку овие техники создава дела кои ги спојуваат фотографијата, експериментот и визуелната поезија.
Досега има реализирано две самостојни изложби и учествувано во повеќе регионални и европски проекти. Често е дел од жири-комисии на фотографски изложби, а преку работилници активно го пренесува своето знаење и искуство во областа на алтернативната фотографија, придонесувајќи за развојот и афирмацијата на оваа уметничка практика.
