Со свеченото доделување на наградите во Центарот за култура „Марко Цепенков“, синоќа во Прилеп заврши 59. издание на Македонскиот театарски фестивал „Војдан Чернодрински“. Атмосферата беше исполнета со аплаузи, силни пораки за потребата од нова театарска зграда во Прилеп и признанија за сè повисокиот квалитет на фестивалот.
„Прилеп е град на театарот, местото на фестивалот, Прилеп е самиот фестивал. Овој град мора да има театар, тоа веќе не е желба, туку потреба,“ истакна уметничкиот директор и селектор на програмата, Ана Стојаноска.
Најголемиот дел од добитниците присуствуваа лично за да ги подигнат наградите што ги додели меѓународното жири во состав: Лилија Абаџиева (претседател), Иван Меденица и Нела Оташевиќ.
Голем успех за НУ Народен театар Битола, чија што претстава „Црно семе“ од Ташко Георгиевски во режија на Андреј Цветановски освои две престижни награди:
- Награда за современа сценска драматизација и адаптација за Јелена Цветановска
- Награда за главна машка улога за Мартин Мирчевски за ликот на Доне Совичанов
„Горди сме што оваа претстава посветена на македонската кауза освои две значајни награди. Ова е поттик да продолжиме уште поупорно во промоцијата на македонската драматургија,“ изјави директорот на Битолскиот театар, Васко Мавровски, упатувајќи благодарност до целата екипа на „Црно семе“.
Успех забележа и сценографот од Битола, Валентин Светозарев, кој ја доби наградата за најдобра сценографија за претставата „Рацин“ во изведба на НУ НТ „Јордан Хаџи-Константинов Џинот“ од Велес.
Во чест на лауреатите, вечерта беше затворена со претставата „Вистината 2“ на Театар Комедија, во режија на Владимир Јурц.
Покровители на 59. издание на фестивалот беа Министерството за култура и туризам и Општина Прилеп.
