Во амфитеатарот на Тумбе кафе во Битола беше одиграна претставата „Кавгата меѓу петте принцези“ во продукција на …. пет девојчиња од иста улица (Ениџе Вардар кај манастирот „Св.Наум“- Битола) кои секојдневно играат заедно во иста улица, делат заеднички играчки, учат во исто училиште и сега остварија заедничка идеја.
„Кавгата меѓу петте принцези“ е вистинска детска претстава, за децата, но и за возрасните. Замислете да им се дозволи светот да го водат децата…ниедна кавга нема да трае подолго од пет минути и никогаш нема да биде здодевно – бидејќи децата растат и учат преку игра.
Пред неколку години две девојчиња посакаа да играат претстава на летната сцена и тој сон им се оствари.
Во претставата играат : Калина Стефановска, Јана Димовски, Бисера Христовска, Јана Петровска, Хана Христовска, Матеа Геровска и Антониа Геровска, а ги подготвуваше битолската актерка Марија Стефановска.
Она што мора да се напомене е дека низ Битола, улицата Ениџе Вардар е позната како улицата на глумците, ако се земе фактот деа од тука поттекнуваат браќата Ацо и Димче Стефановски едни од основоположниците на Битолскиот народен театар во далечната 1944 година.
