Битолскиот театар ја одржа првата прес-конференција за 2025 година, на која беше најавена првата премиера – „Жиголо“, дело на Игор Кузмановски, во режија на Благој Мицевски.
Премиерата на „Жиголо“ е закажана за 1 март 2025. Претставата истражува границите меѓу вистината и маските што ги носиме. Режисерот Мицевски посочи дека се обработуваат актуелни теми како виртуелниот свет и социјалните маски.
Во главните улоги се Марјан Георгиевски, Соња Михајлова, Марија Стефановска, Маја Андоновска Илиевски и Никола Пројчевски. Сценографијата е на Сергеј Светозарев, костимите на Благој Мицевски, а музиката на Марјан Неќак.
Директорот Васко Мавровски информираше дека во сезоната ќе има 10 премиери, меѓу кои 3 праизведби, детска претстава и две претстави за училиштата. Министерството за култура и туризам поддржува 4 проекти, вклучувајќи го 11. издание на „Битола Шекспир Фестивал“ и гостување во Ерменија. НТБ ќе реализира шест проекти со сопствени средства, меѓу кои: „Којзнае зошто?“, „Чорбаџи Теодос“, „Рибарски караници“, „Пламенка“ и „Пипи Долгиот Чорап“.
Битолскиот театар бележи раст – од 14 изведби и 3088 посетители во 2024, на 20 изведби со 4880 посетители оваа година. „Тоа зборува дека кампањата „Дојдете во театар“ и посветеноста на сите вработени кои деноноќно се во театарот, ги даде своите резултати. Горди сме на тоа што го правиме и јавно изразувам благодарност до секој еден посетител кој одделил дел од своето време и го посетил Битолски театар. Во месец февруари морам да кажам дека немавме претстава во која имавме празно седиште“.
Најавена беше и Монографијата „Народен театар Битола“, на авторот Иван Додовски, испишана на 310 страници. „Сметам дека сме гигант помеѓу театрите и први сме во државата кои успеавме да изработиме монографија која е црно бела“, истакна директорот за Монографијата за која ќе има посебна промоција.
