Балетот „Госпоѓиците од Авињон“ посветен на музите на Пикасо изведен од Националната опера и балет синоќа со овации беше награден од публиката во Центарот за култура во Битола.
Воодушеви извонредната балетска игра на Александра Мијалкова, Мими Поп-Алексова-Атанасовска, Ивана Коцевска, Саша Евтимова и Христина Наќевска, кои настапија заедно со одличните Мирослав Митрашиновиќ, Балаж Лашеи од Унгарија, Агим Бафтии и Ендру Кук од Англија. Олга Панго, која е кореограф и режисер на претставата, со асистентите Горан Божинов и Саша Евтимова направија впечатлива кореографија, а заедно со сценографските елементи на Валентин Светозарев, играта на светлото на Милчо Александров, костимите на Раде Василев и шминкaта на Златица Поповска, овозможија неверојатно искуство за публиката. Музиката за балетот е компонирана од Калиопи Букле.
Публиката со долг аплауз го награди тимот што работеше на овој балет и особено извонредните балетски играчи, кои донесоа магија на сцената.
