НУ Народен театар Битола ќе биде меѓу основачите, потписниците и членови на новоформираната Балканска асоцијација на театри и фестивали, значајна иницијатива чија цел е продлабочување на културната соработка, размена на искуства и заеднички развој на театарската уметност во регионот.
Ова беше официјално најавено на прес-конференција во рамките на Меѓународниот фестивал Бабел Фаст во Трговиште, Романија, на која присуствуваше и директорот на НУ Народен театар Битола, Васко Мавровски. На настанот учествуваа и директорот на Театарот „Тони Буландра“ од Трговиште и директор на фестивалот Бабел Фаст, Мек Ранин, како и уметничкиот директор на фестивалот, Ливиу Келоју.
Со членството во оваа асоцијација, НУ Народен театар Битола продолжува да ги зајакнува своите меѓународни партнерства и да биде активен промотор на македонската театарска уметност пред светската публика.
Во своето обраќање, Мавровски го претстави Битолскиот театар и изрази задоволство што институцијата за првпат е дел од еден од најреномираните меѓународни театарски фестивали во регионот.
Во рамките на фестивалот, Народниот театар Битола се претставува со претставата „Ричард Трети“ од Вилијам Шекспир, во режија на Мартин Мирчевски, потврдувајќи го високото уметничко ниво на македонскиот театар и неговото успешно претставување на меѓународната сцена.
