КОД 369 и Паркети ја претставија својата најнова заедничка песна и видеозапис „Vode nas svjetla“, наменета за публиката низ целиот регион.
Проектот е реализиран со поддршка на Croatia Records, а премиерно беше емитуван на CMC Televizija. Станува збор за песна во инди-поп стил, која носи летна атмосфера и раскажува приказна за претстојниот период исполнет со авантури, симпатии и случајни средби што можат да прераснат во долготрајни пријателства и љубови.
Музиката е дело на Сашо Паркет, текстот го потпишува Ирена Димовска, додека аранжманот е на Даниел Митревски и Сашо Паркет. Песната е снимена во студиото „Ателје“ на Даниел Митревски.
Видеозаписот е во продукција на Дејан Трајчевски – Ендорс Продукција, со светло мајстор Никола Георгиевски и шминка од Ксенија. Како локација за снимањето е искористен Центар за култура Битола.
Изведувачите упатија благодарност до директорот Сашо Илковски, како и до Амир Бахтијаревиќ и Мирна Шкргатиќ за поддршката во реализацијата на проектот.
