Театарската школа „Бабец“ годинава одбележува 12 години постоење — 12 години посветени на сцената, на детската креативност и на љубовта кон уметноста. Дванаесет години исполнети со детски гласови што растат во сигурни, храбри и искрени изрази. Дванаесет години во кои соништата добиваат форма, движење и свој аплауз.
„Бабец“ не е само школа — таа е првиот чекор кон сцената, првиот настап пред публика, првата победа над тремата и првото откритие дека уметноста живее во секого од нас. Тука се создаваат генерации кои учат да слушаат, да чувствуваат, да создаваат и да веруваат во себе.Основана на 5 април 2014 година, „Бабец“ е првиот професионален едукативен центар посветен на театарската уметност кај децата.
Школата ја води актерката Јулијана Мирчевска, дипломиран актер и магистер за работа со надарени и талентирани деца, а денес брои над 25 активни членови.
„Тука се раѓа љубовта кон театарот — онаа што не згаснува. Голем дел од вас веруваа во нас од самиот почеток и токму поради вашата поддршка, чекор по чекор, успеавме храбро да се искачиме кон ѕвездите. Ви благодариме за довербата и љубовта во изминатите 12 години. Останете со нас — заедно ќе продолжиме да создаваме спомени што ќе траат засекогаш“, истакна Мирчевска.
Во оваа школа се создаваат млади генерации кои преку театарот го откриваат својот глас и својата светлина. Дел од претставите што произлегоа од оваа креативна сцена се: „Вреќа полна желби“, „Сакам да сонувам“, „Зоки Поки“, „Тажната нула“, „Трите прасиња и Дедо Мраз“, „Дојдовме“, „Снежана и седумте џуџиња“, „Јас Македонија“, „На гости кај Кате и Фреда“ и многу други.
Среќен 12-ти роденден, „Бабец“! Аплаузот за вас — никогаш да не престане.
