На 2 февруари 2026, во Eco Hub – от на Факултетот за биотехнички науки при Универзитетот “Св. Климент Охридски” – Битола, се одбележа Светскиот ден на блатата (World Wetlands Day), проектната активност во рамките на Еразмус + проектот ПРИРОДАТА НА ВОДНАТА СРЕДИНА: ВКЛУЧУВАЊЕ И ПОДИГНУВАЊЕ НА СВЕСТА ВО РАЗЛИЧНИ ОПШТЕСТВА (НИДА).
Главен координатор на проектот е Karadeniz Technical University – KTU од Трабзон, Турција, а Факултетот за биотехнички науки – Битола, претставуван од проф. д-р Дијана Блажековиќ – Димовска (локален координатор), проф. д-р Весна Карапетковска – Христова и проф. д-р Билјана Трајковска, е партнерска институција во проектот.
Како резултат на Меморандумот за соработка склучен помеѓу Универзитетот „Св. Климент Охридски“- Битола и СОУ Гимназија „Јосип Броз Тито“ – Битола, на овој настан зедоа активно учество ученици од четврта година, природно-математичка насока (комбинација Б), заедно со помошник директорката м-р Даниела Петровска, со единствена цел, продлабочување на соработката во областа на образованието, науката и подигнувањето на еколошката свест кај младите.
Работилницата беше реализирана со современ едукативен пристап, со акцент на практично знаење, критичко размислување и активно учество на учениците кон прашањата поврзани со климатските промени, еколошката деградација и заштитата на водните екосистеми. што целосно кореспондира со целите на проектот.
Настанот беше подготвен и реализиран од страна на проектниот тим: проф. д-р Дијана Блажековиќ – Димовска, Проф. д-р Весна Карапетковска – Христова и Проф. д-р Билјана Трајковска.
Почнувајќи од 2 февруари 1997 година, секоја година на истиот датум, но со различна тематска содржина, овој ден се одбележува во многу земји во светот, кои се договорни страни или потписнички на Конвенцијата за блата (Рамскарската Конвенција), усвоена во 1971 година, во иранскиот град Рамсар. Конвенцијата за блата (Convention on Wetlands / Ramsar Convention) е меѓувладин договор што обезбедува рамка за зачувување и мудро користење на блатата (влажните подрачја) и нивните ресурси.
Нејзина основна улога е да се развие и одржува меѓународна мрежа на блата (влажни ресурси) кои се важни за зачувување на глобалната биолошка разновидност, како и за одржување на човечкиот живот преку одржување на нивните компоненти, процеси и придобивки/услуги на екосистемот“.
Денес, Рамсарската листа е најголемата мрежа на заштитени подрачја во светот и во нејзини рамки влегува секоја блатна локација (Ramsar Site) која според Рамсарската конвенција е означена како локација од меѓународно значење.
Конвенцијата утврдува дека „блатата треба да бидат избрани на Листата поради нивното меѓународно значење во однос на екологијата, ботаниката, зоологијата, лимнологијата или хидрологијата“. Блатата вклучени во Листата добиваат нов статус на национално ниво и се признати од меѓународната заедница како влажни подрачја од значајна вредност не само за земјата или земјите во кои се наоѓаат, туку и за човештвото како целина.
Во моментот, на Рамсарската листа, од Македонија се вклучени Преспанското езеро (1995 година ), Дојранското езеро (2007 година) и Охридското езеро (2021 година).
