На сцената на Народен театар Битола, вечерва (28 јуни) со почеток во 20 часот ќе се одржи премиерата на претставата „ЕДМОНД“ од американскиот драмски писател Дејвид Мемет, во режија на Оливер Мицевски.
Претставата беше најавена на прес-конференција на која креативниот тим и актерската екипа зборуваа за предизвиците и значењето на ова дело.
„ЕДМОНД“ го следи падот на главниот лик – Едмонд Бурк, обичен бизнисмен кој, во обид да ја пронајде смислата и возбудата во животот, го напушта својот досаден семеен и професионален живот, и тргнува во спирално патување низ њујоршкото подземје. За само 48 часа, неговото „ослободување“ го води кон кривични дела, затвор и неминовна пресметка со самиот себе.
Во режисерската визија на Оливер Мицевски, „ЕДМОНД“ не нуди директни одговори, туку отвора клучни егзистенцијални прашања: што е слобода, дали е можно да бидеме навистина слободни и зошто современиот човек, и покрај сè што има, сè повеќе тоне во осаменост и очај.
„Внимавај што посакуваш“ – е мотото на оваа мрачна, провокативна и длабоко човечка драма, која преку брутален јазик и интензивни сцени ги поттикнува гледачите на длабока рефлексија.
Во претставата настапуваат:
Огнен Дранговски
Валентина Грамосли
Соња Михајлова
Марјан Георгиевски
Ана Грамосли
Борче Ѓаковски
Александар Стефановски
Филип Мирчевски
Викторија Степановска Јанкуловска
Маја Андоновска Илијевски
