Учениците на Детското ликовно студио „Свети Кирил и Методиј“ од Битола постигнаа огромен успех на 22. издание на Светската детска ликовна изложба по конкурс, организирана од Министерството за образование и наука на Романија, Општина Липова и Детскиот ликовно-креативен клуб од Липова.
„Конкурсот во Романија, кој во основа е организиран од тамошното Министерство за образование и наука, ни е еден од побитните во текот на една календарска година, бидејќи знаеме дека жирито е составено од исклучителни експерти во областа на детското сликарство.
На истиот учествуваме сите 22 години колку што трае и редовно сме имале успеси, но овој е најголем досега и сме особено горди на нашите ученици“, изјави Елена Хаџи-Антоновска, претседател на ДЛС.
На 22. издание на Светската детска ликовна изложба по конкурс, во организација на Министерството за образование и наука на Романија, ДЛС учествуваше со 14 дела од 14 свои ученици, од кои 4 се здобија со медали, а 10 со дипломи.
„На конкурсот учествуваа над 20 земји кои формираа фонд од повеќе од 5.000 детски ликовни дела. Ова е само една третина од повикот, бидејќи манифестацијата има три сегменти – фотографија, ракотворби и ликовна уметност, со што бројката на учесници – ученици е значително поголема.
Детското ликовно студио „Свети Кирил и Методиј“ од Битола, согласно Билтенот, е единственото кое ја претстави Македонија, на што повторно сме горди, затоа што нè има насекаде и гордо ги промовираме државата и градот Битола.
Изненади бројот на први места, односно златни медали, кои се доделени на две наши ученички, секоја во својата возрасна категорија. Први места – златен медал освоија Стефанија Димитријовска и Леа Стерјев, а освоени се и два сребрени медали од ученичките Ана Марија Спировска и Андреа Ресановиќ.
Темата изминатите години прерасна во традиционална и е насловена „Боите на есента“, а заедно со сертификатите добивме и покана за учество на 23. издание во 2026 година како почесни учесници, поради прикажаниот квалитет во континуитет.
Ова е одличен показател дека Детското ликовно студио „Свети Кирил и Методиј“ од Битола, иако оставено само на себе, благодарение на тимот – учениците и родителите – функционира одлично по основните постулати востановени пред 58 години. И тоа ни е најбитно“, истакна Славчо Неделковски, претседател на УО при ДЛС.
