„На Поклади“ е новиот роман на Љубе Б. Митрејчевски, во издание на ИК „Матица Македонска“- Скопје.
Романот го опишува битово-рустикалниот живот на селанецот кој не ѝ го знае ликот на парата, необразован, но не и неписмен, воениот виор на Втората светска војна и кога и како почнува да се гради социјалистичкиот голем, светски систем кој остави секакви мерливи и немерливи траги – кои се бележити симболи за – сè што дошло, нека влезе и нека си замине по патот свој, битно е човештината да остане во човека.
Писателот Митрејчевски направил суптилен преглед на адетите кои се дел од традицијата на македонскиот човек за празникот Поклади – Прочка, со тоа македонската книжевност и фолклористика добиваат извонреден документ со соодветна лексика за како и на кој нашите претци го празнуваат овој значен христијански празник кој во суштина значи помирување на небото со земјата низ вистински, сега романескни настани.
Писателот Љубе Б. Митрејчевски (1960) е роден во Слоештица, Демир Хисар. Член е на Друштво на писатели на Македонија, се занимава со раскажувачка и собирачка дејност. Досега ги има објавено делата:„Секојдневни надмудрувања“ I и II дел, „Нати-Дајми“, Балади:„Патот на болката“, раскази „Облазна судбина“, за деца: „Крај барата“, „Жива азбука“, романи „Белегзија“ и најновиот „На Поклади“ кој беше промовиран во Домот на културата „Илинден“ во Демир Хисар.
Промотори на книгата беа писателите Добре Тодоровски и Биљана Т. Димко, а настанот го збогати и драматизаираниот извадок од „На Поклади“ – секој на крајот бара простување од некого во кој учествуваа членови на Драмското студио во режија на Гоце Димовски.