Јајцата со години беа во фокусот на дебати околу исхраната, но најновите научни сознанија потврдуваат дека умерената консумација, особено по две јајца дневно, може да има бројни позитивни ефекти врз здравјето.
Богати со висококвалитетни протеини, тие придонесуваат за изградба на мускулна маса, регенерација на ткивата и одржување на енергијата во текот на денот. Две јајца содржат околу 12 грама протеини – идеална доза за хранлив појадок. Покрај тоа, жолчката е извор на холин – важен нутриент за работата на мозокот. Тој ја подобрува меморијата, концентрацијата и, според истражувањата, може да го намали ризикот од одредени невродегенеративни заболувања.
Јајцата се и пријатели на здравиот вид. Лутеинот и зеаксантинoт, антиоксиданси присутни во нив, го штитат окото од штетното UV зрачење и го забавуваат процесот на дегенерација на макулата, што е особено важно со возраста.
Кога станува збор за имунитетот, само две јајца дневно обезбедуваат значителен дел од дневната потреба за витамин B12, селен и витамин D – комбинација која му помага на организмот да се заштити од инфекции и воспаленија.
Долгогодишниот мит за штетноста на јајцата поради холестеролот постепено се руши. Современите студии покажуваат дека умерената консумација не е штетна за срцето кај здрави лица, а може дури и да помогне во одржување на рамнотежата меѓу добриот и лошиот холестерол.
Во светот на здравата исхрана, едноставните намирници често се највредни – а јајцето е вистински нутритивен бисер.
