Традиционално, во ресенското село Болно, како и во неколку преспански села, за празникот Богојавление се негува еден уникатен обичај, стар можеби и повеќе од два века, според сведоштвата на најстарите жители.
Крстот, кој датира од дамнешни времиња, секоја година на 20 јануари се предава од семејство на семејство, откако претходната вечер свечено се одбележува празникот. Со оваа традиција е поврзана и детална евиденција – во посебен тефтер се запишува кој бил домаќин, колку средства се донирале и за што биле наменети.
Крстот е украсен со монети и приврзоци, како и други украси кои ги купува актуелниот домаќин и ги поставува на крстот.
Дел од нив се рачна изработка, а еден од приврзоците датира уште од 1863 година, што сведочи за длабоката историска вредност на овој обичај.
Во селото постојат неколку вакви крстови – секоја маала има свој крст, кој традиционално се предава од година во година.
За жителите на Болно, овој обичај има огромно значење. Тој претставува живо сведоштво за зачувувањето на историјата, традицијата и духовната оставина од нашите предци, која и денес се пренесува со голема почит и гордост.
