Преминувањето на летно сметање на времето, кога стрелките на часовникот се поместуваат еден час напред, можеби изгледа како мала и безначајна промена. Но, за човечкиот организам тоа претставува вистински мини-шок кој може да предизвика низа физички и психички реакции. Летното сметање на времето започнува во последната недела од март. Во 2026 година, тоа е на 29 март (недела), кога во 02:00 часот стрелките се поместуваат еден час напред, односно на 03:00 часот.
Нашето тело функционира според внатрешен биолошки ритам кој го регулира спиењето, будењето, апетитот и нивото на енергија. Кога времето се менува, овој ритам се нарушува и на организмот му е потребно време за повторно да воспостави рамнотежа.
Со губењето на еден час сон, многумина веќе во првите денови чувствуваат замор, поспаноcт и намалена концентрација. Дури и малото нарушување на сонот може да влијае врз расположението и способноста за извршување на секојдневните обврски. Луѓето стануваат пораздразливи, почувствителни и полесно подложни на стрес, што дополнително го отежнува процесот на адаптација.
Промената на ритамот може да има влијание и врз физичкото здравје. Во првите денови по поместувањето на стрелките, кај дел од луѓето се забележуваат варијации во крвниот притисок, како и зголемен ризик од срцеви тегоби. Овие појави најчесто се поврзани со недостатокот на сон и зголеменото ниво на стрес, кои директно влијаат врз работата на срцето и целокупниот кардиоваскуларен систем.
Како што објаснуваат стручните лица, ваквите промени не треба да се потценуваат. „Иако станува збор за само еден час разлика, организмот го доживува тоа како нагла промена во ритамот. Најчесто се потребни неколку дена за телото повторно да се синхронизира. Во тој период, важно е да се одржува редовен сон, да се избегнува дополнителен стрес и да се поминува повеќе време на природна светлина“, велат лекарите.
Истовремено, намалената концентрација и заморот можат да доведат до зголемен број на грешки во секојдневието. Не е реткост во овој период да се случуваат повеќе сообраќајни несреќи или пад на продуктивноста на работното место. Организмот едноставно има потреба од време за да се усогласи со новиот ритам.
Иако оваа промена трае само еден час, нејзиното влијание врз човекот е реално и понекогаш прилично изразено. Затоа е важно да му се помогне на телото полесно да се прилагоди, со доволно одмор, повеќе движење и изложеност на дневна светлина. Со малку внимание и грижа, овој краткорочен стрес може да се надмине, а подолгите и посветли денови да се искористат на најдобар можен начин.
