Со свечена церемонија и доделување на признанија и награди, во Битола заврши 44. издание на светската ликовна детска колонија „Мал битолски монмартр“. Настанот и оваа година ја потврди својата меѓународна вредност, угостувајќи 150 учесници – ученици, професори и родители – од 18 делегации, претставници на 17 земји од Европа и светот.
Меѓу присутните беа млади уметници од Македонија, Албанија, Бугарија, Босна и Херцеговина, Хрватска, Чешка, Индија, Израел, Малезија, Црна Гора, Полска, Романија, Србија, Словачка, Русија, како и од турските региони Трабзон и Кајсери. Колонијата повторно се претвори во креативна лабораторија на пријателства, културна размена и инспиративна уметност.
На затворањето, на сите учесници – ученици, професори и асистенти – им беа доделени дипломи за учество, како и благодарници за поддржувачите и волонтерите кои придонесоа за успешната реализација на манифестацијата. Благодарници беа врачени на Црвен Крст Битола, медиумскиот покровител „Читај Бе“, волонтерите Илче Филкоски и Пенелопа Колевска, како и на Огулчан Аџар – волонтер од Трабзон, Турција.
Беа доделени и награди за „Специјални колекции“, од кои една беше врачена на претставникот на Индија, додека останатите две ќе бидат испратени по пошта до учесниците од Хонг Конг (Кина) и Ајер Итам (Малезија).
Жири-комисијата додели и 13 награди за уникатен уметнички пристап и развој во ликовното изразување. Добитници се:
- Онур Мете Јузук – Турција
- Ела Климекова – Словачка
- Тамара Чировиќ – Црна Гора
- Шарлин Нг Јун Хан – Малезија
- Диана Мехта – Индија
- Јали Алперт – Израел
- Маркета Хејлова – Чешка
- Стела Бабиќ – Хрватска
- Борис Шафрадин – Босна и Херцеговина
- Мерием Арнаутска – Бугарија
- Сабрина Погони – Албанија
- Микалина Мура – Полска
- Ана Полизовска – Македонија
Специјалната награда за „Најдобар учесник – ученик“ на 44. издание на колонијата му беше доделена на Ајшенур Карадениз од Ателјето на професор Вејсел Аџар од Трабзон, Турција, во име на Детското ликовно студио „Св. Кирил и Методиј“ од Битола.
Во име на градоначалникот на општина Битола, заменик градоначалникот Бојан Бојковски ја додели наградата за „Најдобро школо – учесник“ на ликовното ателје „Артино“ од Белград, Србија.
Со ова завршува уште едно успешно издание на „Мал битолски монмартр“, каде Битола, уште еднаш, стана центар на детската уметност и креативност.
