Турција е на чекор од драстични промени во туристичкиот сектор поради сè поголемото фрлање храна и растечките цени на намирниците. Властите во Анкара подготвуваат нови правила со цел да ги намалат загубите во угостителството и хотелскиот бизнис, а тоа би можело да значи и крај за омилениот „all inclusive“ систем.
За многумина, кога ќе се спомне летен одмор со „all inclusive“ понуда, првата асоцијација е сончевата Турција. Илјадници туристи од регионот таму уживаат во неограничени оброци и пијалоци. Но, според податоците на Турската фондација за спречување на фрлање храна, секоја година во земјата се фрлаат околу 23 милиони тони храна, а дури 35 проценти од овошјето и зеленчукот завршува во отпад.
Проблемот е најизразен во туризмот. Туристите, имајќи можност да земаат храна без ограничување, често земаат повеќе отколку што можат да изедат. Според Рамазан Бингол, член на Советот за земјоделска и прехранбена политика, дури половина од оброците за појадок во „all inclusive“ хотелите завршуваат во ѓубре.
Поради тоа е подготвен извештај кој наскоро ќе му биде доставен на претседателот Реџеп Таип Ердоган. Документот содржи предлози за промени во начинот на кој работат рестораните и хотелите.
Еден од главните предлози е воведување на принципот „избери што ќе јадеш“, односно заменување на „all inclusive“ моделот со „à la carte“ систем, во кој секој гостин ќе нарачува точно онолку колку што сака и може да изеде. Ваквото решение би го намалило расфрлањето, но и би ја зголемило свесноста на туристите за поодговорна потрошувачка.
