Летото традиционално го поврзуваме со високи температури, долги сончеви денови и уживање на отворено. Но, сѐ почесто сме сведоци на нагли промени во времето – по неколку дена пеколни жештини, следува изненадно заладување, дожд, па дури и бурни ветрови. Овие температурни осцилации не се само непријатни – тие можат сериозно да влијаат и на нашето здравје.
Нашето тело е чувствително на временските услови. Кога температурите брзо се менуваат, организмот мора да се адаптира, а тоа бара енергија и активирање на одредени физиолошки механизми. Кај здравите луѓе тоа обично минува незабележано, но кај оние со хронични болести, постари лица, деца и луѓе со ослабен имунитет, наглите температурни промени можат да предизвикаат влошување на состојбата.
Најчести здравствени проблеми при временски осцилации:
Главоболки и мигрени – Промените во температурата и воздушниот притисок често предизвикуваат проширување или стегање на крвните садови во мозокот, што може да доведе до силни главоболки.
Кардиоваскуларни проблеми – Наглото загревање или заладување може да го оптовари срцето, особено кај луѓе со висок крвен притисок, аритмии или срцева слабост. Потребно е внимателно следење на симптомите и редовна терапија.
Проблеми со дишењето – Промените во температурата и влажноста на воздухот можат да ги влошат симптомите кај астматичари или лица со хронична опструктивна белодробна болест (ХОББ).
Општа исцрпеност и замор – Кога телото постојано се адаптира на екстремни услови, може да се појави чувство на слабост, замор, па дури и несоница.
Настинки и вируси – Иако летото не е типичен период за грип и настинки, чести се вирусни инфекции, особено кога по пеколни денови нагло настапи свежо време. Климатизацијата и ненадејното ладење на телото исто така придонесуваат за овие состојби.
Како да се заштитите?
- Прилагодувајте ја облеката – Слоевито облекување дури и во лето може да помогне при нагли температурни разлики, особено рано наутро и доцна навечер.
- Избегнувајте излегување при екстремни услови – Ако можете, избегнувајте излегување кога е најжешко, но и кога има ненадејно заладување, особено ако сте хроничен болен.
- Пијте доволно течности – Хидратацијата помага телото полесно да се справи со временски промени.
- Јадете лесна храна – Претерано мрсна и тешка храна дополнително го оптоварува организмот.
- Внимавајте на климатизацијата – Разликата меѓу внатрешна и надворешна температура не треба да е поголема од 6-8 степени Целзиусови.
Совети за хронично болни:
- Консултирајте се со матичен лекар ако чувствувате влошување на симптомите.
- Редовно проверувајте го крвниот притисок.
- Прилагодете ја физичката активност според временските услови.
Летото не секогаш носи стабилно и предвидливо време. Промените на температурите можат да бидат вистински предизвик за организмот. Со мала претпазливост, адаптација и внимание кон сопственото тело, можеме да го поминеме и најнепредвидливиот летен ден здраво и без последици.
