Љубезен и услужен персонал – ова е „најпријателскиот“ аеродром во светот

Љубезноста на персоналот, атмосферата и услугите на аеродромот играат голема улога во тоа како патниците го доживуваат своето патување. Според ново истражување на британската компанија Airport Parking & Hotels, токму тие фактори одредуваат кои аеродроми во светот се најпријателски расположени кон своите посетители.

Анализирани биле повеќе од 71.000 Google рецензии од патници ширум светот, при што се пребарувале клучни зборови како љубезен, услужен, пријателски настроен и професионален.

Резултатите покажале дека Меѓународниот аеродром Таојуан на Тајван убедливо го зазел првото место — дури 73,6% од сите рецензии ја споменуваат љубезноста и професионалноста на неговиот персонал.

Аеродромот Таојуан, најголемиот и најпрометен во Тајван, се наоѓа во градот Дајуан, околу 40 километри западно од Тајпеј. Тој нуди летови кон повеќе од 100 светски дестинации и е познат по чистотата, ефикасноста и насмевките на вработените.

На второ место се најде аеродромот Корнвол Њуквеј во Обединетото Кралство, каде 73,3% од патниците ги пофалиле пријателските и услужни вработени.
Третата позиција ја зазеде аеродромот Нарита во Јапонија, со 73,1% позитивни рецензии. Освен љубезноста, патниците биле воодушевени и од богатата понуда — од ресторани до салони за убавина.

Топ 10 најљубезни аеродроми во светот (2025):

1. Меѓународна аеродромска лука Таојуан (Тајван)
2. Аеродром Корнвол Њуквеј (Обединето Кралство)
3. Меѓународен аеродром Нарита (Јапонија)
4. Аеродром Саутемптон (Обединето Кралство)
5. Меѓународен аеродром Феникс Скај Харбор (Аризона, САД)
6. Аеродром Солт Лејк Сити (Јута, САД)
7. Аеродром Минесота-Сент Пол (Минесота, САД)
8. Меѓународен аеродром Џеџу (Јужна Кореја)
9. Аеродром Дубаи (Обединети Арапски Емирати)
10. Аеродром Роналд Реган Вашингтон (Вирџинија, САД)

Иако модерните аеродроми денес нудат безброј содржини, од трговски центри до уметнички инсталации, истражувањето уште еднаш покажува дека најмногу се памети човечката топлина.
Патниците најмногу ја ценат насмевката, добрата комуникација и чувството дека некој навистина сака да помогне.