Со концерт на групата „Меморија“, вечерва на Ракометното игралиште, официјално се затвори 14. издание на битолското културно лето БИТ ФЕСТ.
Во изминатите два и пол месеци, многубројната публика имаше можност да проследи голем број концерти на класична, поп, рок, џез музика, театарски претстави, ликовни изложби, уметнички перформанси, фестивали и други настани низ кои се промовираше културното наследство, традицијата и народниот мелос.
„Сакам да се заблагодарам на сите оние кои беа учесници на годинешниот Бит Фест 2022, во мое име, во име на луѓето од Општина Битола кои се заложија се да биде како што треба, Советот на Општина Битола, но најмногу до музичарите, уметниците и до Вас, граѓаните кои дадовте поддршка на сите манифестации. 140 настани, преку 44.000 присутни на настаните, 77 денови, 9 фестивали…спектакуларно започнавме со Каролина, фасцинантно ќе завршиме со „Меморија“, групата на нашата младост, групата која ја возвишува македонската рок музика“, изјави пред почетокот на концертот, градоначалникот на Општина Битола, Тони Коњановски.
За време на сите фестивалски денови, Битола ја посетија уметници и културни работници од Македонија, но и од голем број други земји, меѓу кои: Израел, Полска, Чешка, Швајцарија, Турција, Шпанија, Италија, Колумбија, САД, Србија, Полска, Црна Гора, Албанија, Франција…
Фото: Саше Богоевски
