25-годишната Лина Лумбуровска од Битола е уште еден од многуте примери за млад човек кој е успешен во својата струка надвор од Македонија. Лина дипломираше во Љубљана, Словенија, на Факултетот за компјутерски и информатички науки, а моментално освен што го подготвува и својот магистерски труд, таа работи и по својата струка како Front-end developer во Бон, Германија. Во интервјуто со Лина поразговаравме за темата „Startup и вештачка интелигенција“ која што ни дава слика што нé чека во иднина, имајќи го предвид брзото темпо со кое се развива технолгијата и се величи вештачката интелигенција, секако со цел подобрување и олеснување на животите на луѓето ширум светот.
Читај бе: Лина, од твоето досегашно искуство, како би го опишала поимот „startup” и кое е неговото точно значење во виртуелниот свет?
Лина: Со поимот „startup“ би ја дефинирала секоја компанија која се наоѓа во почетната фаза од својот развој. Вообичаено основачите на стартапите се обидуваат да привлечат надворешни инвеститори со цел да го поддржат својот развој. Надворешните инвестиции не само што се особено значајни на самиот почетокот, туку и во понатамошните фази, кога стартапот се соочува со висок ризик за успех или неуспех.
Читај бе: Кажи ни нешто накратко за вештачката интелигенција. Според сегашните статистики и она на кое што моментално работиш во Германија, колку вештачката интелигенција ќе ни биде секодневие во иднина?
Лина: Со помош на вештачката интелигенција моментално се работи на замена на многу човечки операции, а тоа значи дека со помош на системи или машини се заменува досегашното и познато човечко извршување на операциите. Целта е секако со повторливо извршување на истите да се добијат подобри информации. Моментално оваа област е многу повеќе застапена отколку пред неколку години и истата би се развивала уште повеќе во иднина.
Читај бе: Како би ја опишала твојата професија како програмер и на што сé треба да биде подготвен секој поединец кој е заинтересиран да ја работи оваа професија во иднина?
Лина: Оваа професија би ја опишала како една доста динамична и флексибилна професија која нуди огромен број на можности. Секој поединец од оваа област треба да биде подготвен на континуирано учење, бидејќи технологиите се развиваат и менуваат со брзо темпо. Од друга гледна точка пак, флесибилноста е огромна и секој поединец има простор да се пронајде во она што е најдобро за него.
Читај бе: Си работела во Македонија и Словенија, а моментално си успешна на ова поле и во Германија. Што беше пресудно за пренасочување на кариерата во Германија?
Лина: Главните предизвици за пренасочување за мене беа преминувањето од голема фирма во стартап кој сметам дека претставува еден поинаков развој на кариерата, добра понуда, приклучување во новосоздадена фирма, избор на технологиите и желба за учење од областа на вештачката интелигенција.
Читај бе: Кои разлики си ги забележала во самиот развиток на кариерата пред да го напуштиш работното место во Македонија и откако се пресели во Германија?
Лина: Разликите кои ги забележувам моментално се поголеми одговорности во самата фирма, што е сосема очекувано бидејќи станува збор за мал тим и областа во која работам е целосно различна. Самото тоа за мене претставува еден голем предизвик со многу новитети и учење од различни области (примарно развој на веб апликации и машинско учење).
Читај бе: Во иднина, кои би биле позитивните, а кои негативните страни на startup и вештачката интелигенција и кога истата би можела целосно да се вгради во образовниот систем?
Лина: Преку стартапите се развиваат можности за нови иновации и развој на целото општество, меѓутоа секогаш ќе постои и самиот ризик за неуспех. Како главна придобивка на вештачката интелигенција во образовниот систем би ја издвоила можноста за брзи одговори меѓу наставниците и учениците, со што се подобрува универзалниот пристап за учење. Недостатокот тука е намалување на потребата за физички пристап и намалување на потребата од физички контакт меѓу наставниците и учениците.
Читај бе: За крај би сакала да им пренесеш краток совет на нашите читатели, а особено на оние кои во иднина планираат да се приклучат кон ИТ сферата.
Лина: Би сакала да ги поддржам сите поединици кои имаат интерес за оваа сфера во иднина да вложат време и финансии за да станат дел од неа. Сметам дека областа на ИТ нуди многу опции, се развива во правилна насока и придонесува олеснителни околности за општеството.
